Nsunsuanso a Sarkodie kasahare Nnwom nya wɔ Atiefo so.

Abstract

Dwumadi yi yɛ kwalitetif nhwehwɛmu a ɛfa ɔnwontoni Sarkodie kasahare nwom binom ho mpɛnsɛmpɛnsɛnmu. Dwumadi yi ahwɛ nsunsuanso a kasahare nnwom no nya wɔ atiefo so. Migyinaa nsɛmtiban ne kasasu ahorow a ɛda adi wɔ kasahare nnwom ahorow du a mede yɛɛ me nhwehwɛmu no so hwɛɛ nsunsuanso pa a Sarkodie kasahare nnwom no nya wɔ atiefo so. Dwuma yi gyinaa Iser (1978) Ɔkenkanfo-Adwenkyerɛ Nnyinasosɛm so gyee akenkanfo anaa atiefo no adwenkyerɛ fa nsɛm a Sarkodie de di dwuma wɔ ne nnwom ahorow du a mede yɛɛ me nhwehwɛmu no so. Nhwehwεmu yi de Praemari ne Sɛkɛndri nsɛmmoano nyinaa dii dwuma. Afei, migyinaa nhwehwεmu yi botae so de nyiyimu kwan a egyina botae so paw nnwom du a mede dii dwuma no, beae a meyɛɛ me nhwehwɛmu no ne nnipa a mede wɔn dii me dwuma no. Nhwehwɛmu no mu nsunsuanso de too gua sɛ nsɛmtiban binom a epue wɔ Sarkodie kasahare nnwom no mu bi ne bɔnefakyɛ, ɔdɔ, nwetaaso, anibere, anisɔ, kɛtɛasehyɛ, guasohantan ne ade. Kasasu bi nso te sɛ nnyegyei koro ntimu, ntimu, nnyinahɔma, sɛ-nipa, ɛbɛ, kasakoa ne ampɛ-mmuae nsɛmmisa yɛ kasasu ahorow bi a ɛda adi wɔ nnwom du a mede yɛɛ me nhwehwɛmu yi. Nsunsuanso bi nso a ɛnam nsɛmtiban ne kasasu ahorow yi so ba atiefo no so bi ne nkuranhyɛ, afutusɛm, nkanyan, adwenkyerɛ ne adesrɛ. Nhwehwɛmu yi mu nsunsuanso da no adi sɛ kasahare nnwom no nyɛ ahuhunwom sɛnea animdefo binom susuw no. Mmom, ɛwɔ nsunsuanso pa a sɛ atiefo nya ntoboase tie a enya wɔ wɔn so.