Akanfoɔ akɔmfodwom ne asɔredwom ntotoho

Abstract

Dwumadie yi de n’ani sii so sɛ εde Akanfoᴐ akᴐmfodwom ne asᴐredwom bεtotoho na ada twaka ne nsonsonoeε a εda nnwom mmienu ntam adi. Akanfoᴐ akᴐmfodwom ne asᴐrwdwom no gyina hᴐ ma abosomsom ne kristosom wᴐ nhwehwεmu yi mu. Ԑsiane sε mentumi mfa Akanfoᴐ akᴐmfodwom ne asᴐredwom ahodoᴐ no nyinaa nyε nhwehwεmu no nti, mefaa Boᴐtwerewa akᴐmfodwom ne Mεtᴐdistfoᴐ nnwom (‘hymns’) yεε nyinasoᴐ. Mehwɛε Boᴐtwerewa akɔmfodwom ne Mεtᴐdistfoᴐ nnwom (“hymns”) mu kasasuo ahodoɔ bi, nnwom no nhyehyεeε ne ne toᴐ mu, na ɛmu na εdaa twaka ne nsonsonoeε a εda nnwom mmienu yi ntam adi. Dwumadie yi maa mehunuu sɛ, sε obi bɛte kasa bi ase yie na woakyerε n’adwene anaasɛ woayi ano, kasasuo di mu akotene pii. Yei akyi, megyinaa akenkan, nsrahwɛ ne nkɔmmɔdie ahodoɔ so na ɛdaa adi sɛ, Akanfoɔ akɔmfodwom ne asᴐredwom mu nsɛm de anigyeɛ, awerɛkyekyerɛ, nkanyan, ahosɛpɛ ne nkuranhyɛ brɛ ɛho atiefoɔ ne akenkanfoᴐ. Ԑnso hᴐ ara, Akanfoɔ akɔmfodwom ne asᴐredwom mu nsɛm sane da kristofoᴐ ne abosomsomfoᴐ gyidie, wᴐn amammerɛ ne amanneɛ adi, εkyerε kasa, abakɔsɛm, amanyɔ, subanpa ne subanmmɔne ahodoɔ a ɛkokɔ so ɛnnɛ mmerɛ yi mu. Yei kyerɛ sɛ, Akanfoɔ akɔmfodwom ne Mεtᴐdistfoᴐ nnwom nyinaa mu nsɛm da abrabɔ ne asetena mu osuahunu adi.