Akan (Fante) ebisaa ho sentase na pragmatese mpɛnsampɛnsamu

Abstract

Duwmadzi yi pɛnsampɛnsam Akan (Fante) ebisaa mu wɔ sentase na pragmatese kwan do. Dwumadzi yi yɛ “kwalitefti” nhwehwɛmu. Sentase nhyehyɛɛ mu no, ebisaa no daa edzi wɔ nkyekyɛmu ebien mu; ebisaa a n’asɛntɔw nhyehyɛɛ no gyina su na dwumadzi do. Ɔdaa edzi wɔ ebisaa a hɔn nkyɛmu gyina su do no mu dɛ, bi yɛ asɛntɔw tsiaba, asɛntɔw mbɔho, asɛntɔw tsentsen na asɛntɔw kuntann. Nkyɛmu a ogyina dwumadzi do no, ɔdaa edzi dɛ ebisaa no bi dzi dwuma dɛ asɛmbisa na asɛnka. Sentase mpɛsampɛnsamu no gyina Asɛntɔw Su na Dwumadzi Adwenmusɛm do. Dwumadzi no kɔr do kyerɛɛ kwan a kɔntɛst na amambra boa wɔ ebisaa ne ntseasee mu. Ɔyɛ nokwar pefee dɛ kasasua kɔntɛst a ogyina adwen a nkasafua a ɔwɔ ebisaa no mu dze ma fa nyiano noho no mmboa mma ntseasee no nnda edzi yie. Ebisaa mpɛnsampɛnsamu a ɔdaa edzi wɔ pragmatese kwan do no gyina Asɛnhia Adwenmusɛm (Relevance Theory) a Sperber na Wilson (1986) dze bɔbɔɔ adze do. Ebisaa a ne ntseasee yɛ traa mu no, nkasafua a ɔwɔ mu da adwen bi edzi fa nyiano noho a ɔboa ma otsiefo no nya ntseasee. Nyia a ɔrema nyiano no so tum dze ne suahu nye nyimdzee a ɔfa ndzɛmba etwa noho ehyia no dzi dwuma tse ase. Ebisaa ne ntseasee kyer adwen mu no, ebisaa no mma nyimdzee biara mmfa nyiano noho. Amambra ho nyimdzee no boa otsiefo ma onya kɔntɛst a ɔdze tse ebisaa no ase. Nhwehwɛmu yi da Mfantse ebisaa edzi na ɔma aman nyinara hu dɛ ɔwɔ sentase na pragmatese soronnko